Heilbrigðisskoðun "Klár í keppni"

“Klár í keppni” á LM2026 
Brúnastaðahöll & Svaðastaðahöll

Lögbundin heilbrigðisskoðun sýninga- og keppnishrossa á stórmótum verður framkvæmd FYRIR eftirfarandi greinar á LM 2026: 

• Milliriðla í A fl. gæðinga, B fl. gæðinga og ungmennaflokki
• Úrslit í A fl. gæðinga, B fl. gæðinga og ungmennaflokki
• Forkeppni og úrslit í T1
• Seinni spretti í 150 og 250 m skeiði
• Yfirlitssýningu kynbótahrossa, 5 vetra og eldri

Hrossin skulu mæta til skoðunar daginn fyrir hverja keppnisgrein / sýningu, með múl en án ábreiðu. Mikilvægt er að aðeins ein manneskja fylgi hverjum hesti, knapi, eigandi eða aðstoðarmaður. Viðkomandi skal hafa meðferðis upplýsingar um þann beislisbúnað sem notaður var í forkeppni eða milliriðlum (ekki nauðsynlegt fyrir kynbótahrossin).

Heilbrigðisskoðunin felur í sér eftirfarandi atriði:

1. Skoðun á almennu ástandi (holdafari, eitlum og öndun auk líkamshita og hjartahljóða ef ástæða er til).
2. Skoðun á fremsta hluta munnsins. Tungan tekin til hliðar (án deyfingar).
3. Fætur þreifaðir og heltiskoðun (hreyfingar á feti og brokki).

Ef einhver eftirfarandi atriða finnast er hestur dæmdur „óhæfur til sýningar eða keppni” og fær ekki að fara inn á keppnisvöllinn:

• Vansæld og/eða veikindi
• Vanþrif (undir 2,5 í holdastigun)
• Hiti, óeðlileg öndun og hjartahljóð
• Bólgnir eitlar, áberandi hósti og/eða mikil graftarkennd útferð úr nösum
• Alvarlegir áverkar í munni
• Sár  í gegnum slímhúð í kinnum, munnvikum og tungu, stærri en 1 sm, eða minni sár sem eru aum og bólgin
• Sár í gegnum slímhúð á tannlausa bilinu
• Bólga og/eða eymsli á tannlausa bilinu
• Greinileg hörfun slímhimnu fyrir framan við fremsta jaxl samhliða eymslum
• Bólga tengd beinhimnu eða beini á tannlausa bilinu
• Keðjusár í gegnum húð, stærri en 1 sm, eða aum og bólgin sár
• Alvarlegir áverkar á fótum
• Bólga og eymsli í sinum og/eða böndum (kvíslböndum, stuðningsböndum, liðböndum), tengd vægri helti
• Bólga í sinaslíðri, beinhimnu, liðum og hófum tengd vægri helti
• Ágrip á fótum (sár í gegnum húð, 1 sm eða stærri)
• Ágrip á hælþófum með greinilegum eymslum og bólgu í undirliggjandi vef
• Önnur stærri sár á húð
• Alvarlegt múkk, umfangsmikið og/eða aumt
• Helti
• Annað sem að mati eftirlitsdýralækna gerir hross óhæft til sýningar eða keppni

Niðurstaða um að hestur sé „óhæfur til keppni“ er tilkynnt yfirdómara / sýningarstjóra. Hestur sem hefur verið dæmdur „óhæfur til keppni“ í einni grein má ekki keppa í neinni annarri grein né koma fram á nokkurri sýningu á sama móti.

Á eftirfarandi tímum verður tekið á móti hrossum sem eiga að mæta í skoðun. Athugið að til einföldunar fyrir knapa og sýnendur, er boðið upp á tvær staðsetningar, Svaðastaðahöllin á Sauðárkróki og Brúnastaðahöllin á Hólum.