Sýningargreinar

Á landsþingi Landssambands hestamannafélaga haustið 2024, var samþykkt að A-flokkur ungmenna væri sýningargrein á landsmótum. Mótsstjórn LM2026 hefur ákveðið að bjóða uppá þessa grein á mótinu í sumar og einnig B-flokk áhugamanna.

Mótsstjórn hefur sett reglur um fyrirkomulag, framkvæmd og þátttökurétt knapa í þessum flokkum. Hestamannafélögin þurfa að bjóða upp á þessa flokka í sínum úrtökum til þess að eiga rétt á að senda fulltrúa til keppni í þeim á komandi landsmóti.

Að öðru leyti en fram kemur hér fyrir neðan fer val hrossa til þátttöku í þessum flokkum fram í gegnum úrtökur hestamannafélaganna samkvæmt lögum og reglum LH.

B-flokkur áhugamanna

  • Knapar skulu vera í fullorðinsflokki, þ.e. 22 ára og eldri.
  • Ef skráðir þátttakendur eru 35 eða færri verður ekki riðin sérstök forkeppni, heldur hefðbundin forkeppni og aðeins A-úrslit. Verði þátttakendur 36 eða fleiri verður riðin sérstök forkeppni, milliriðill, A- og B-úrslit.
  • Ef skráðir þátttakendur ná ekki 25 þá fellur flokkurinn niður.
  • Ekki verða teknir inn keppendur af stöðulista í þessum flokki.
  • Knapi má einungis skrá einn hest til þátttöku í þessum flokki.

Sjá nánar í reglugerð um B-flokk áhugamanna.

A-flokkur ungmenna

  • Keppnispar öðlast keppnisrétt.
  • Knapar skulu vera á aldrinum 18-21 árs. Ekki er leyfilegt fyrir knapa í barna- og unglingaflokki að keppa upp fyrir sig.
  • Ef skráðir þátttakendur eru 35 eða færri verður ekki riðin sérstök forkeppni, heldur hefðbundin forkeppni og aðeins A-úrslit. Verði þátttakendur 36 eða fleiri verður riðin sérstök forkeppni, milliriðill, A- og B-úrslit.
  • Ef skráðir þátttakendur ná ekki 25 þá fellur flokkurinn niður.
  • Ekki verða teknir inn keppendur af stöðulista í þessum flokki.
  • Knapi má einungis skrá einn hest til þátttöku í þessum flokki.

Þátttökuréttur í A-flokki ungmenna miðast við fjölda félagsmanna sem skráðir eru í félagatali hestamannafélaga LH þann 15. apríl 2026. Aðildarfélög mega senda 1 keppanda fyrir hverja 250 félaga og svo framvegis.

Val hrossa til þátttöku í A-flokk ungmenna skal fara fram hjá félögunum eftir lögum og reglum LH um gæðingakeppni og úrtökur. Einungis keppnispör sem ná gildum árangri í úrtöku síns félags, í A-flokki ungmenna eru gjaldgeng til þátttöku í flokknum.