Drög að dagskrá LM 2026

Fyrstu drög að dagskrá Landsmót hestamanna sem mun fara fram á Hólum sumarið 2026 hafa verið birt á vef mótsins, landsmot.is. 

Mótið mun hefjast sunnudaginn 5.júlí á forkeppni í barnaflokki á gæðingavelli og á kynbótavellinum byrja 4ra vetra hryssur.  Mótinu lýkur svo laugardagskvöldið 11. júlí  með pompi og prakt.

Á síðasta LH þingi var samþykkt að A-flokkur ungmenna væri sýningagrein á Landsmóti og hefur verið tekin sú ákvörðun að bjóða uppá þessa grein á komandi Landsmóti ásamt því að B-flokkur áhugamanna kemur einnig inn sem sýningargrein.

Óskað er eftir því að hestamannafélögin bjóði því uppá A-flokk ungmenna og B-flokk áhugamanna í sínum úrtökum til að eiga gjaldgenga fulltrúa í þessar greinar á komandi Landsmóti.

Helstu reglur varðandi þátttakendur í B-flokki áhugamanna (gæðingaflokkur 2) eru eftirfarandi:

- Knapi má EKKI hafa keppt í meistaraflokki í íþróttakeppni og gæðingaflokki 1 í gæðingakeppni á keppnisárinu.

- Val hrossa í gæðingakeppni B-flokk áhugamanna á Landsmóti (gæðingaflokkur 2) skal fara fram hjá félögunum eftir lögum og reglum LH um gæðingakeppni og úrtökur. Einungis keppnispör sem ná gildum árangri í úrtöku síns félags, í gæðingaflokki 2 eru gjaldgeng til þátttöku í flokknum.

- Miðast við aldur í fullorðinsflokki (22 ára og eldri).

- Öll félög mega senda 1 fulltrúa.

- Aðildafélög sem mega senda fleiri en einn fulltrúa í hefðbundinn flokk mega senda helmingi færri í áhugamannaflokkinn (1 keppanda á hvern 250 félaga o.s.frv.)

Nánari upplýsingar um hliðardagskrá, skemmtidagskrá og fleira verða birtar síðar. Fyrstu drög að dagskrá LM2026 má finna hér.